| زواجي ،،الاول وليس الاخير ..؟؟
|
اهلا اهلا ..
مالي خلق مقدمات وخرابيط <== ودها بس ماعندها
ادخل في الموضوع دغري
اااه يا حب الطفولة. .. وما ادراك ما حب الطفولة ..
الكل اتوقع مرت عليه في طفولته وحب احد او شي زي كذا ..
المهم .....
قدر الله علي وصار عندي بنت خالة مفهية وتحب الهبال والفخفخة ..
الشاهد انها طويلة العمر في حدا هالايام في شهر من هالشهور في سنة من هالسنين <== على تبن واخلصي ..
كانت قاعدة الظاهر على زلفة الدرجة تطل عـالحوش .. وكانت منهمكة في كتابة شي ..
ما ادري وشو !! المهم صار ذا اللي تكتبه دعوة زواج !! ماش انا شكيت في عقل البنت !! مثلكم الحين .. بس اصبروا اوافيكم بالتفاصيل ..
قلت : وش ذا ؟؟
قالت : دعوة زواج .. قلت : لمين قالت : لك انتي واخوي ..
انا في هالحالة اصفر واخضر واحمر وجهي من الحيا ..
لانه يقال لكم كنت احبه ..
وما شاء الله ما يذن العصر الا وانا موزعين البطاقات ..<== سنعات
ومتسلفة ثوب نفاشي من بنت خالتي الثانية ((انا كنا شارين نفس الموديل بس حقي صغر علي ))<== من صغرها نموها سريع .. وخذت حقها كان لونه ابيض مصفر, او سكري وصخ <== حددي اللون الله يرحم والديك ..
وروحنا اخو المعرس يجيب لنا كيكة امريكانا المدورة تسانكم تعرفونها ..
وكان فيه خاتم صغير من ابو ريالين .. قبله ينشب برجولنا فقلنا نستغله ويصير الدبلة ...
الخاتم كان شفّاف وجواه وردة حمرا <== رومانسية اكثر من كذا ما فيه
حول أذان المغرب الاني أنا في الغرفه فوق قاعده اتمكيج .. ولا بنت خالتي تمسمس في شوشتي.. وتزين لي تسريحه الستينات<< وآآآآآه يالستينات..
والله وتقول بي وتزينها..
ويبدون الحضور يتوافدون من كل البقاع ........
عاد المعرس <== دخلت جو هي وخشتها ...
في غرفة ثانية ما بعد دخل علي .. من يدخله
علي عاد ؟؟ اخوه <== لا تدققون تراهم في الحقيقة حتى يتشابهون ..
اللي في اللعبة حاطينه اخوي <== كل شي ما شي حسب الاصول
المهم بدا العرس ورقصوا وكلوا ..
جت عاد وقت الدخلة ..
والله ويجيبونه ويدخلونه علي في الغرفة ويطلعون.. والا في الغرفة مرااااية كبيييير ة قعدنا نستهبل عندها نتطيول ونتقيصر <== مهوب يم عرس ابد
اخوها عاد ماااصل بشكل من اقواله :
لو يجيك واحد يقول ابي اربع الاف تعطيه ؟؟ لا
ما علينا .. المهم ..
طفوا اللمبات وهشوا البزارين وزبطوا كلش ..
وزفونا انا واياه
وصورونا وحركتات وقطعنا الكيكة بسكين الخضار ..
يوم جا يلبسني الدبلةولا قدت لي <== يا حيل الله ....
مع اني والله كنت نحييفة عص قسم بالله .. ونتدارك المشكلة ويحط الخاتم في اصبعي الصغير ..
وبس ..
يمكن ما يعجبكم !! وتقولون وش تبي ذي من الحياة ..!!
بس يمكن عشاني انا اللي عايشته طالع عندي حلو ..و لا ني كل ماكتبت نقطة .. وقفت وقعدت ا تذكر التفاصيل في بالي .. وانتقل للنقطة الثانية وانا ما بعد كتبت التفاصيل حقت النقطة الاولى ..
عاد ما يحتاج اقول ان امي عقب العرس بيومين عزمتهم في بيتنا وطلبنا من المطعم الظاهر من الرفادة بعد <== ايام الطلب من المطعم اكشخ شي ..
دمتم برعايته .....
ملطووووووووووش من وحده من قريباتي ،،،
| | 
هذه الرسالة تفيد بأنك غير مشتركه أو لم تسجلي دخولك بعد. للاشتراك الرجاء اضغطي هنــا 
العرض العادي
