طلبتكم يابنات تساعدوني

[صمتي هو كلامي]

السلام عليكم ورحمة الله وبركاته

لا ادري كيف ابدأ كلامي

انا ماسجلت وكتبت الا وعارفه انكم ماحتقصروا معاي

اتمنى تفهومني وتساعدوني في حل مشكلتي وصدقوني عمري ماحنسى وقفتكم معاي

ودي احد ينصحني ويوجهني ودي احد يقول لي سوي كذا ولاتعملي كذا

اتمنى كل بنت تقرأ موضوعي ترد علي حتى ولو بنصيحه اذا لم يكن لديها حل



انا فتاة عمري 18 سنه , يعني في سن مراهقه لكن تفكيري وتصرفاتي اكبر من سني

هذا مو كلامي هذا كلام اللي حولي

وانا شخصياً احاول الانتباه على نفسي واحاول اخلي المرحله هذه كويسه في حياتي

ببدأ لكم طرح مشكلتي

انا حبيت واحد واكلمه عن طريق الجوال ورغم ادري ان اللي اسويه اكبر غلط وكنت اقول مستحيل اسوي شي مثل كذا في حياتي لكن حصل هذا الشي مو غصب عني بإرادتي

هو حاول يكلمني وكنت ارفض بشكل فضيع لاني مستحيل اسوي كذا لكن حسيت اني حبيته بجد رغم ان مافي شي بيننا لكن قلبي حبه بجد

كنت ارفض هذا الشعور في البدايه واشغل نفسي بأي شي لاني عارفه ان هذه فترة مراهقه وان هذا مو حب صحيح

لكن بجد صدقوني حبيته اقولها وانا مفكرهـ في كل شي اسويه

هو يقول انه يحبني ويموت علي طبيعي بصدق كلامه وكمان يقول انه يبيني ويتمناني كزوجه له

بداخلي فرحت وارتحت من كلامه واسلوبه معاي لاني بجد يوم فكرت فيه فكرت انه يكون حبيبي وزوجي المستقبلي ان شاء الله

بس مابينت له اني مهتمه بموضوع الزواج ومشغوفه له

طبعاً كل يوم بيننا مكالمات ونتكلم عن حياتي وحياته وبجد اعامله كزوج وليس كحبيب

اهتم فيه واسأل عليه اذا غاب ومااتصل ودي يكون مرتاح ومبسوط مني

انا للحين ماعرضت مشكلتي

مشكلتي هي يوم نتكلم ويكون بيننا كلام رومنسي بجد اخجل منه وماعرف ارد عليه يكون في قلبي كلام كثييير له بس اخجل اطلعه وهو دايم يقول ليش ساكته وكذا انتي تتعبيني

حاولت اقول له الكلام الحلو اللي في قلبي واحسه يرتاح منه كثير ويفرح بس............

يزعجني بطلبه لي

يقول لي ابيك ومحتاجك

يبيني امارس معاه عالجوال , مابي اوضح اكثر اكيد فهمتوني

اول مره قال لي زعلت كثير وقلت له اتمنى ماتتكلم كذا ثاني وتأسف وقال اوعدك مااقول لك كذا ثاني

طبعاً ارتحت يوم وعدني لكن اللي طلبه مني كان شاغل تفكيري

وثاني يوم رجع اتأسف وقال سامحيني على اللي حصل امس مني

انا مااقدر ارد واكون ساكته

بس رجع بعدها بأيام يطلب مني ويلح علي وانا صدقوني رغم حاجتي له بس مابي اسوي معاه اي شي في الحرام ولا ابي اكون كذا في يوم من الايام

لاني قريت كثير اني لو سويت كذا بتعود عليه وشي مو في صالحي ابد

زعلت يوم طلب مني ثاني وقلت له للأسف فهمت حبك اللي تبيني فيه انت ماتبيني الا عشان اريحك وبس

قلت له كل شي بحدود لكن لو تحبني بجد وتبيني كزوجه لك كان ماتجرأت وطلبت مني هالشي

زعل من كلامي وقال صدقيني اني ابيك واتمناك ورجع يتأسف ويقول لي غصب عني وعمري ماكنت محتاج بقد مااكون معاك

يبي يعيش معي كل لحظه

ورجعت قلت له لو تحبني بجد مثل ماتقول لاتفكر تسوي كذا معاي

قال طيب

بس كل يوم اكلمه يرجع لنفس الموال ويطلب مني ويقول مو قادر انا محتاجك

ويوم ارفض كل يوم يقول تحسسيني اني انا انذل لك وانتي تقولي لا

حسيتها كلمه قويه يوم قال انذل لك

حاول معاي كثير ويقول لي كلام عشان يبيني اريحه

يقول شي طبيعي فينا وغصب عننا ومستحيل انتي تكوني بنت وماتحتاجي للشي هذا قلت له اوكي بس مابي اسويه بالطريقه اللي انت تبيها

كل يوم احاول افهمه اني مستحيل اسوي اللي يبيه

لكن يرجع ويطلب مني
مو عارفه في ظنه اني بوافق في يوم من الايام

مره رسلت له رساله وقلت له فيها اتمنى تفهم حبي لك

ولو اني ماأناسبك طلبتك تقول لي وبكل صراحه لاني كل يوم احبك واتعلق فيك اكثر , ولا تفكر اني بزعل من صراحتك بالعكس بكون فاهمتك وبقدر موقفك

دق على طول بعدها وقال وش هالكلام ولاتقولي كذا ثاني انا احبك وابيك وخلاص دام الشي هذا يضايقك صديقني ماحطلبه منك

فرحت من كلامه لاني حسيته يكلمني بجد وقلت خلاص الحمدلله فهمني وعرفني

مر كم يوم بعدها وكان كلامنا عادي وحلو ورومنسي ومايطلب مني شي مثل كذا

وارتحت كثييير وفرحت بس

رجع ثاني وطلب والله اني تعبت معاه وتعبت انا وافهمه وهو يقول لي حرام عليك انا محتاجك وصدقيني غصب عني

اخر مكالمه قلت له خلاص مايصير كل مره تطلب وانا ارفض وانت عارف اني مستحيل اريحك كذا

زعل بجد وعصب وقال انتي تعامليني كأني اي واحد جاي من الشارع انا رجال وعندي احاسيس ومشاعر واحتاج لك وانتي ترفضي مو عارف كيف تفكيرك فيني وقال كلام كثير وهو معصب ويصرخ وانا ساكته

ويوم نطقت قلت له من غير ماتعصب انا قلت لك من قبل لو اني مااناسبك خلاص قال وش خلاص يعني حبي لك كلام فاضي وحبك لي لعب عشان تقولي خلاص بكل سهوله

زعل بجد مني ومو عارفه وش اسوي معاه والله احترت وتعبت

ارجووووكم يابنات ابي مساعدتكم لي مو عارفه وش اسوي

صدقوني ولا احد في حياتي يعرف اني اكلم شخص واني احب شخص

اخواتي يحسوا بالتغيير اللي فيني بس ماظني يتوقعوا ابد اني اسوي شي مثل كذا

يكون نفسي اكلم احد واشكي لاحد اللي بيني وبينه سواء زعل او فرح بس صدقوني مو قادره اقول لاي انسانه تعرفني

اول مره ابوح لأحد واتمنى الاقي منكم حل للشي اللي يصير لي

بس ارجوكم لاتقولوا اتركيه لاني بجد بجد حبييته واتمناه هو شريك حياتي

مابي اسيبه ولا ابيه يكون لغيري

اتمنى تكونوا فهمتوني

منتظره مساعدتكم وحل مشكلتي بفاارغ الصبر

[ريحة الجنة]

حبيبتي وبنتي صمتي هو كلامي حياتي بعد عمري اغلب الفتيات تمر بمثل مامررتي به اشكر صراحتك في طلق العنان بموضوعك الحساس حياتي برافو برافو برافو علىقوتك وصمودك برغم الاغواء
بنوتي الحلوه انتي وقعتي بالحب وشباكه اتركيه اذا بالفعل ايحبك اكيد اكيد قولي له يخطبك من اهلك جمدي قلبك حبيبتي اكتشفيه من الحين عشان بكره ماتندمين ياعمري وحرام بنتي اتمارسين اي شي على الجوال او الايميل انتبهي عشان ماتكونين فريسه انا بتواصل معكي ولكن ادعو ان تكوني كما انتي قويه صامده لان اذا مارستي معه اي شي سوف يرميك لان الرجال مايبغى يضع الا الزوجه العفيفه في بيته وبكذا تفقدين عفتك دمتي بخبر عزيزتي الغاليه ولاتنسين الصمود

[اللؤلؤةالمكنونة]

أختي الغالية والله قريت قصتك وتأثرت فيها
أتمنى انك تصيرين قوية وتحاولين تنسين حبه أكثري من قرأة القران والدعاء بأن الله ينزع حبه من قلبك
مع الالحاح بالدعاء أنه حب مراهقه يزول مع الأيام وكل فتاة مرت بهذه المرحلة ندمت
ولاتغيري نظرة أهلك فيك خليك عند حسن ظنهم
وانا من خلال قصتك اتضح لي انا هذاالشاب غرضه غير شريف يريد أن يستغل حبك له
حتى لو تزوجك ماراح ترتاحين معه يبدأ يعيد لك الماضي ويشك فيك
نصيحة من أخت حنونة لأختها الصغيرةأكثري من الدعاء بأن الله ينزع حبه
في البدايه يكون صعب كيف أنساه بس لاتفكري بالقلب فكري بالعقل
أنا اعرف بنات كثير عمرهن ماكلمن شباب وتزوجن شباب كانو يكلمون بنات ومانجحت زواجاتهن لانهم
صاروايشكون فيهن لانهم كانو يكلمون وصار ماعندهم ثقة
واتمنى انك تعتبريني أختك الكبيرة

[ام عزوزي]

حياك الله اختي الغاليه

وشئ جدا رائع انك ابحتي بمشكلتك وان شاء الله احنا معاك بكل الخطوات الى ان تنحل باذن الله

مشكلتك يالغاليه يبيلها وقت ونقاش طويل

احنا بناقشك بصراحه وانتي نفس الشئ علشان نتوصل جميعا لحلها وباقتناع منك شخصيا

اول شئ عندي كم سؤال ابيك تجاوبيني بصراحه بعدها يبدا النقاش

كيف تعرفتي على هذا الشاب؟؟

كيف علاقتك باهلك جميعا واحد واحد؟

ايش ترتيبك بين اخوتك ؟؟

علاقتك باخوانك الشباب كيف؟؟

تسمعين اغاني وتشاهدين افلام وهل عندكم دش؟؟

هل بطبيعتك انطوائية ؟؟

وهل عندك غرفة نوم خاصه ام مشتركه ؟؟

اعذريني على طول الاسئله لكن علشان اتفهم نفسيتك اكثر

غاليتي شئ طيب وحلو منك من البدايه عارفه انه شئ مو كويس اللي تعمليه

والاروع صمودك امام طلبه


بانتظارك يالغاليه

[صدى الوجدان]

خذي هذه النصيحة مني نصيحة المحبة الى أختها الغالية ابتعدي عنه ولا تكلمينه الان شباب عندما يكلمون الفتاة عن طريق الجوال أو النت لا يثقون بها كالزوجة ولذلك يسحبوها بالكلمات الحلوة والغزل والاماني وانه يتمناها ان تكون زوجة له بس علشان يحقق ما يريد وأعملي يالغالية ان الذئاب البشرية عندما تنتهي شهواتهم الحيوانية او رفض الفتاة طلب ما يريد يتركها ويبحث عن صيدة أخرى أختي انتي الان تمرين بفترة المراهقة ولذلك انصحك على المداومة على قراة القران وحفظة وقرات الاذكار اليومية حتى تكون لك حصن واتعظي من غيرك قبل ما يتعظ الغير منك وانتي في مقبل العمر أكثري من الصيام وادعي الله دعوة صادقة ان تتخلصي من هذا الذئب وان يرزقك شاب ذو الاخلاق رفيعة يحبك ويصونك ويعزك وذات دين وخلق حتى تفوزان بالدنيا والاخرة وسوف أدعيلك في كل صلاة ان يسهل الله أمرك وان يرزقك الزوج الصالح لكن لابد منك العزيمه والاصرار على ترك هذا الشاب حتى لو تطلب الامر ان تغيري الجوال حقك

[صمتي هو كلامي]

ريحة الجنه واللؤلؤه المكونه وام عزوزي وصدى الوجدان

بجد سعدت بكلامكم لي ونصحكم لي كنت محتاجه احد يكلمني ويوجهني

بس صدقوني حاولت اني ابعد عنه بس ماقدرت لاني انا اساساً مابي ابعد عنه ومابيه يكون لغيري

صعب علي اتركه تعودت عليه بجد

غير حياتي بكاملها لدرجة ان امي سعيده مني من بعد ماكلمته

يعني ماصرت اسهر كثير واقوم الصباح مع امي بأمر منه هو اللي شجعني على كذا يقول خليكي معاها وساعديها في الطبخ وشوفي عشان بعدين تسويلي مثلها

ودايم يوصيني عليها وعلى ابوي ويذكرني بالصلاة وقراءة القران ويوصيني بأشياء كثيره اقرب صديقاتي ماقالولي عليها

صدقوني هذا اللي محببني فيه احسه انسان جاد وواعي مو مثل باقي شباب هالايام اتصالهم كله حب وكلام فاضي مثل مااسمع

بس هو عيبه الوحيد انه يطلبني بالشي اللي قلت لكم عليه ومو عارفه كيف اتصرف معاه

والله صعب علي اتركه لإن دايم يقول اوعديني ماتخليني واوعده وهو كمان يوعدني نفس الوعد

بس مااقدر اقول له تعال واخطبني احسها مو حلوه تجي مني ابيها تجي منه هو


ام عزوزي يالغاليه بجواب على اسئلتك وصدقيني بكون على تواصل معكم لين اوصل لحل مشكلتي

بس مابي الحل اني ابعد عنه واتركه ياليت تفهموني بجد


كيف تعرفتي على هذا الشاب؟؟

بصراحه من النت هو مهندس كمبيوتر وكنت ابي مساعده وماقصر معاي وكان كلامي معاه خفيف لاني مو متعوده اخاطب احد ابد وهو كمان كان جدأ محترم معاي

ومع الكلام عرفت انه من نفس بلدي وفرحت وهو كمان قال سعيد اني اكلم وحده من نفس بلدي طبعاً تواصلي معاه ماكان يوم والا يومين تقريباً خمسه ايام والمشكله انحلت وكنت افكر فيه بس مثل ماقلت لكم اشغل وقتي لاني عارفه اني في فترة مراهقه وان هذا مو حب هذا مجرد اعجاب لا اكثر
وبصراحه بدينا نحب بعض بس انا ماكنت ابين له ابد ولا هو ماكان يبين بس كنت حاسه


كيف علاقتك باهلك جميعا واحد واحد؟

الحمدلله علاقتي معاهم كويسه يعني مااعاني من مشاكل ولا من اي شخص سواء اخواتي او اخواني او امي وابوي

ايش ترتيبك بين اخوتك ؟؟

انا اصغر وحده في البيت

علاقتك باخوانك الشباب كيف؟؟

بصراحه علاقتي معهم ممتازه احبهم ويحبوني والحمدلله مترابطين في كل شي
وكل اللي حولينا يقول اننا نادرين يعني اهتمامي باخواني قوي وهم كمان يقولوا كل الشباب ماعندهم اخوات مثلكم يهتموا فيهم ويخافوا عليهم

تسمعين اغاني وتشاهدين افلام وهل عندكم دش؟؟

اسمع اغاني كثير بس مااحب اشاهد افلام وعندنا دش بس ابد مااجلس عليه ابد

هل بطبيعتك انطوائية ؟؟

لا بالعكس

وهل عندك غرفة نوم خاصه ام مشتركه ؟؟

لا مشتركه بيني وبين اخواتي

~~~~~
اخواتي الغاليات صدقوني كلامكم اثلج صدري وفرحت باهتمامكم لي والله اكتب ودموع عيني تنزل من كثر فرحتي بوجودكم وتوجيهكم لي بشكل خاص

الله يسعدكم ويريح عليكم دنيا وآخره مثل ماريحتوا علي

[الحب اسمى عاطفة]

يا حيا الله بج اختي

اختي قبل كل شي وقبل لا تتهورين

انصحج فكري بعقل ..فكري بعقل..وارجع اعيدها فكري بعقل

اختي انا متاكده مليون بالميه انج ما مرتاحه في حياتج

حسيت من جلامج انج عارفه انه يلي تسوينه غلط في غلط

اختي هذا يلي تمرين فيه شي طبيعي تمر فيه العديد من الفتيات

اختي لازم تقسين على نفسج وعلى يلي تحبينه وقوليله اذا يبيج صج خليه يخطبج

اقسي على نفسج واتركيه حاولي ما تكلمينه

صدقيني انتي الحين ما مرتاحه وحاسه بتانيب الضمير ..>>>> صح والا انا غاطانه

توج اصغيره في بدايه حياتج اختي لا تدمرين حياتج معااه

صدقيني من خلال رمستج حسيته ما يصلحلج

انتي تعرفتي عليه وطحتي في حبه ( صدقيني حب وهمي )

هو غرضه موب شريف والدليل انه مستحيل انه حبيب يطلب من حبيبته هذا الطلب

هو يبي يلعب عليج واختي حاذي لا تخلين الكلام المعسول يسحبج وراه

انتي وش يضمنلج يمكن يسجل صوتج ويقعد يهددج فيه ..>>> فكري فيهاا كيف بتعيشين حياتج بعدين

دامج ما غلطتي اختي ابعدي عنه احسن لج

هو رجال والرجال مثل الوحه سوده لو يخطي ما يخطي ولو تشخبط عليها ما يبين شي

اما البنت مثل الوحه بيضا ممكن اي شي يبين فيهاا ويلزق فيها طول العمر

اختي غيري رقمج ولا تردين على اتصالاته

اول فتره بتكون صعبه عليج بس صدقيني بعدين بتتعودين وبيصير الموضوع عادي

واذا هو يبيج صج خليه يخطبج

اختي والله مشان مصلحتج

اقسي على نفسج شوي وان شاء الله فتره طيش وتعدي

حاولي تشغلين نفسج باي شي ونحن هنا في النادي مثل خواتج وحدري النت او اشغلي نفسج بقرايه الكتب او مطالعه التلفزيون

واهم شي حاولي لا تقعدين ابروحج خليج دايم مع اهلج عسب تنسينه وما تعطين نفسج فرصه اتفكرين فيه

صدقيني اول فتره بتكون صعبه عليج من بعدهاا بتتعودين

اسفه على الاطاله

اختج

عطوفه

واذا تبين مساعده لا يردج الا الكيبورد

[صمتي هو كلامي]

الحب اسمى عاطفه

مشكوره يالغلا على نصحك اللي احسه طالع من قلب وتسلمين على خوفك لي

بس صدقيني اني مفكره بعقلي ولو اني ماشيه بقلبي كان سويت اللي يبيه

والله اني مرتاحه في حياتي والحمدلله اشكر ربي على كل حال

بنات افهموني انا ابيه واتمناه لي مابيه لغيري افهمووووني

حبيت اوضح لكم نقطه

كثير بنات اعرفهم تزوجوا بالطريق هذا منهم نجح ومنهم فشل واللي فشلت حياتهم مو بسبب شك والا عدم ثقه يعني لأمور ثانيه

واقرب مثال اختي متزوجه واحد عن طريق حب وعايشين حياتهم ماشاء الله حلوهـ وسعيدين منها وبينهم عيال كمان

يالغالين انا دايم احب اقدم الخير قبل الشر ومتفائله بحياتي

خليكم معاي وساعدوني وافهومني مابي اتركه تكفووون

[منال]

اختي الغاليه

لا اريد ان اقول لك انككل الشباب سيئين و.....و....و.... والكلام الكثير الذي يقال في مثل هذه الامور

ولكن شيء واحد فقط اقوله لك انظري الى هذا الكم المجنون من المكالمات الهاتفيه على الانترنت وهي فضائح لفتيات وقعن في وهم الحب

اختى انت عمرك 18 سنه يعنى في سن زواج وهو شاب يستطيع الزواج فلوكان صادقا لماذا لايأتي عن طريق الباب ؟؟؟؟؟


غاليتي :

لاتدعي لاحد على وجه الارض طريق عليك

واولهم الانسان اذي سيكون زوجك

لان الشاب لايرضى ان يتزوج من فتاه كانت ................... على علاقة معه ............

وحتى لو حدث لن يستطيع الاستمرار معاها

لان...بعد زواجهم سيصبح لكل رنة جوال في حياتهم معنى وشبهه و لو راها تتحدث حتى لو مع امها .......... سيخطر على باله الف علامة استفهام

لان يستطيع الوثوق بها ولن تستطيع الوثوق به

غاليتي : الزواج رباط مقدس اذا لم يبنى على الثقه ولم يبدأ صح لن يستمر


كل ماعليك هوان تضعي نصب عينيك ....................الكثير من بنات الناس اللاتي وجدن فضائحهم على الانترنت ومن وجدها هو اخوها او ابوها .....وانت عقلك كبير ولن ترضى لاهلك مثل هذا الموقف؟؟؟ لاسمح الله


اذا كان يريدك ياتيك عن طريق اهلك والا فلا تندمي عليه


اسأل الله العلي القدير لك الستر

وان يرزقك الله الزوج الذي يعوضك خير

[الغلا]

صدفيني يا اختي ....الشيء الوحيد اللي خلاك تتعلقين فيه هو انه يوصيك بفعل الخير والقراءة الدائمة للقران وبر الوالدين .........وهذه والله انها طريقة جديدة للشباب لتثق الفتاة فيهم وتكون فريسة لهم على اساس ثقتها فيهم ....فهمتيني اكيد ....