اخي يعذبني

[منهم و فيهم]

السلام عليكم اخواتي
انا عمري 20سنه ممممممممممممم عندي اخ ترتيبه قبل الاخير يعني<<<متوسط اخواني

هذا اخوي عمرة 9 سنوات بالصف الثالث الابتدائي انا المسوؤلة عن تدريسه راح اكتب مشكلتي عسى منكم اجد الحل

بوصف لكم طباعة وطريقه حياته اليوميه عسب تساعدوني:
1) اهم واكثر وقته يقضيه على mbc3
يعني ايام المدراس اول ما يوصل يقعد ع التلفزووووون لين العصر ,,حياته ابدا مافيها نشاطات دايماً كسوول ,جسمه ابد ابد ابد مافيله حيويه لما نوصيه على شغله يااااااااااااااالله يتحرك بصعوووبه وكانه مكسر حطب....

2)الدراسه<<وهني يجي دوري اذا جاء وقت الي اقووله قم جيب كتبك يلا تلاقووونه
آآآآآآآآآآآه

مشغول البال اشرح للجدران قاعده ابد ما ينتبه معاي

وانا وحده ااااوووه عصبيه انسى نفسى لما اضربه و بقوولكم بصراااحه
انا وااايد اصير عنيييييفه وما عرف شو الكلمات التي تظهر من لساني
بس هل هو يحس ؟؟؟؟؟ لا

مممم يمكن اتهور بضربه ابسط حركه منه يمكن حتى عشواانيه تلاقوني اطيح فيه ضرب
الحين انتوا اعرفكم بتنصحوني اوكي عطوني نصائح لي وله..

كيف اغيرمن حياااته ؟؟ كيف اطور علاقته بالدراااسه ؟<< مع العلم مستواااه الدراسي زفت ضغيف في كل المواد ونحن ((أهل الامارات)) منهاجنا صعب وانا ما راح الووومه بس الي يقهرني انه ابد ابد ابدا ما تعرف يقراء كلمة على بعض يعني يبالي ادرسه من الاساسي..

عطوني طريقه او جدول مرتب لاني من باجر راح ابدا ادرسه من اول من التاسيسي
ساعدوني عطوني طرقكم مع ابنائكم او اخوانكم او تجاربكم في حل مسأله صعبه مرة عليكم!!! كيف اغير جو الدراسه الكئيييب كيف اشجعه على المشااركه بالصف؟؟ كيف ابني ثقته بنفسه؟؟

بلييييز ساعدوني...بعد اسبوع راح يبدا الدواام وراح يرجع للمدرسه وانا نااويه بإذن الله اني احسن مستواااة و اطول باااالي .....دعوااتكم معاي ولا تحرموني من مشاركتكم تجاربكم و خبراااتكم....

 

 

[دلوعتي]

هلا بك

اشكر خوفك على اخوك وحرصك عليه

اولا وين اهلك عنه

ثانيا

لابد من وضع وقت محدد للتلفزيون

لان اطفالنا تعودوا طول مالبرامج تبث انهم يتفرجوا وهذا خطا

كل شي وله وقت

يعني قوليله راح تتفرج من الوقت الفلاني للوقت الفلاني


ووقت الدراسة

خليه وقت محبب

تحملي

قوليله اذا انتبهت راح اخليك

مثلا تتفرج لمدة نص ساعه او اعطيك شي هو يحبه

او اي حاجه


ادخلي في تنافس انت وهو

مثلا من كذا لكذا نشوف من يمشي اكثر

او العبي انت وهو


اكسبي اخوكدام انه صغير

لانه لو كبر وهو على هذا الحال الله يعينكم

خليه يوميا يروح للبقاله مشي او لاي مكان

بالنسبة للقراءة

اكتبي كم كلمة بخط كبير على ورقه وعلقيها في مكان يشوفه

لمدة كم يوم

وخليه يقراها
ثم ارفعيها واكتبي غيرها

وهكذا لمدة اسبوعين وبعدين خليه يكتبها او العبي معاه لعبه مين اشطر

وهكذا


طمنينا عليكم

 

 

[شوق القصيم]

اختي الغاليه

ذكرتيني بمعاناتي مع بنتي في بداية دراستها ...........

كانت نفس الحاله تقريبا

وانا عانيت منها لدرجة ماتتصورينها ............وفي الاخير ياست وجبت لها مدرسة خاصة تابعت تدريسها بالمنزل

والحمد لله بعد مرور السنه الاولى تحسن ادائها قليلا

لكني وفي سنة ثالثة رجعت لحالتها وهي عدم الفهم والتركيز

وانا مثلك عصبية لدرجة ما تتصورينها

اصبحت ادرسها وانا منشغله بعمل منزلي حتى لا اضربها وتكون بعيده عني

مثلا اقوم بتسميع القران لها وتحفيضها اياه وانا بالمطبخ وهي بالصاله >>>>>>>>>>الجيران يحفظون معنا

ههههههههههه

كل هذا تجنبا من اني اعصب عليها واضربها

وشوي شوي تحسنت حالتها بالتشجيع

وعلى فكرة ......

لو ترسمين لها جدول يومي لمتابعتها في المنزل جدول عبارة عن مربعات كبيره

كا مربع برمز للمادة

وبعد تسميع الدرس ترسمين وجه حزين او وجه سعيد على حسب الطفل

وبصراحه الطريقه هذي ساعدتها كثير

 

 

[ام عزوزي]

اختي لازم يكون لابوك او امك موقف معاه

لانه ماراح يسمع منك لانك اخته

ولازم تحددي وقت معاه للتلفزيون

الله يهديه

 

 

[الحب اسمى عاطفة]

يا ويلي الاسبوع الياي بتفج المدارس

حشي ما تهنينا بالاجازه خخخخخ

ختي انا عندي اخت ريلي مثل اخوج ضبط

بس الفرق انه هي نشيطه خاج ايطار الدراسه ووقت الدراسه تيلهاا حاله كسل فضيعه

حاولي اول شي انج ما تدرسينه وانتي وهو بروحكم

خلي الوالد او الوالده حاضرين معاكم حتي لو بس ييلسون في الغرفيه يلي انتي تدرسينه فيهاا

بعدين اولا اذا كتب بخط حلو امدحيه وخليه يتشجع و اعطيه ثقه بنفسه >>> استعملتها ويا اخت ريلي وايد فاده معاهاا اقصد اسلوب المدح والتشجيع

راجعيله دروسه اول باول وخليه يكون حافظ الدرس بدرسه لا تفوتيله درس موب حافضنه وكل اسبوع سويله مراجعه

خاصه على كتاب العلوم والتربيه الاسلاميه والرياضيات هذيلا يبيلهن متابعه اول باول

اما بالنسبه للتربيه الوطنيه و اللغه العربيه و الانجليزي اذا كان يركز ويا الاستاذ راح يسهل عليج تدريسه هالمواد

حاولي انج ما تعصبين عليه ولا تصارخين في ويهه لانج انتي تتعبين وهو يمل وتكرهينه في الدراسه اكثر

حطي عنج حلاوه هو يحبهاا واذا ما تعبج في تدريسه كافْيه بهاا

حاولي تشجعينه حتي لو تقدم بنسبه درجه وحده

واذا كان عنده رسوب حاولي قدر المستطاع رفع دجاته في التقويم الاول

خلي الاهل والاخوان يشجعونه وخفوا عليه النزيعه

اذا لا حظتوا انه تحسن اشتريله هديه حتي لو بسيطه وغلفيهاا له وعطيه اياهاا وقوليله اذا تحسنت اكثر بخاى ابويه يشتريلك كذا


المشكله انه ولد ومدارس الاولاد ما تشجع الطلبه وايد

شوفي اذا في عندكم نظام الصفوف الخاصه
( هذي الصفوف تكون للطلبه يلي مستواهم نازل او فهمهم بطئ )

خلي هلج ينقلونه في صف خاص لانه عدد الطلاب يكون فيه قليل والاستاذ ينتبه للطلبه اكثر

اخويه كانت مستواه متنح على الاخر ويوم نقلوه صف خاص طلع الثاني ما شاء الله عليه

وايد وايد اتشجع


اسمحيلي على الاطاله اختي

وطمينا على اخوج

 

 

[ريماني]

السلام عليكم

يا أختي والله حاسه فيج

أنا مسؤووله عن أخواني بعد

عندي أخوي في الصف الثالث كان كتابته شخابيط يعني يكتب كلمه فوق وكلمه تحت ونص الكلمه فوق ونص الكلمه تحت

وكتبه ودفاتره وسخه كأنه ولد في الروضه حشى والله ولد أختي في الروضه ودفاتره أنظف من دفاتر أخوي

المهم مسكته من التقويم الثاني

أول شيء طلعت أمي وأبوي من السالفه كلها لأنه آخر خواني ودلعه ما خطف على حد

المهم مسكته كل يوم بعد صلاة العصر يجيني على بيتي

النسخ ما لي دخل فيه يكتب بروحه

وإن ما كتب بخط حلو أقوم أمسح كل كلمه خطأ في البدايه كنت أمسح جمل بس الحين لا ما أمسح شيء

يجتهد في كتابته أكثر من أول

في الرياضيات ركز ويا الأستاذ >>>>>>>>>>>> حطيناه في صف خاص لأنه مستواه كان نازل بعد

ولعلمج الصف الخاص مب للمتخلفين عقليا لا للي ما يركزون في الحصه ويبيلهم مقابل

الحمد الله تحسن في الرياضيات بروحه حتى أنه وايد يحب الرياضيات والحين يحل بروحه

مشكلتي وياه الحين في الحفظ حفظه تعبان والقراءه عنده زفت

ناويه أستمر وياه في النص الثاني والله يعينا عليه

المهم الغاليه أهم شيء عليج تسوينه

أول شيء لا تعصبين عليه شوي شوي العصبيه ما بتوديج مكان >>>>>> أقولج عن تجربه

ثانيا حددي له وقت للدراسه بعد مسلسل هو يحبه أو قبل شوفي متى يكون تركيزه أحسن

أخواني يجوني بعد ما يخلص مسلسلهم لي يحبونه يركزون وياي أكثر

وخلي البدايه على الأقل أنه يحل واجباته أول بأول والنسخ والإملاء

شوي شوي بروحه بيتطور

خليه وقت القراءه يتبع بصبعه عشان يعرف شكل الكلمات مره على مره بتثبت في راسه

الله يكون في عونج عليه

بس أهم شيء لا تعصبين وعليج بالكلمه الطيبه

"تعال يا أبوي بدرسك "" اليوم أنت شاطر ومركز " " تستاهل هديه على الحل لي حليته"

صدقيني أثرت في أخوي ما تتصورين كيف عندي يصير رجال مب ياهل

وحتى قام يحل النسخ لي عليه في البيت قبل وقت الدراسه

هذا كان في النص الأول ما أدري أثر الإجازه كيف بيكون عليه

 

 

[الحب اسمى عاطفة]

ريماني حليلج با اختي اثره مخبلبج الولد ونحن خبر خير خخخخ

عساج على القوه