صور محزنة بالحرم النبوي بالمدينة المنورة

[بشرى]

تستوقف أغلب المصلين بالحرم النبوي مناظر وصور محزنه
وخصوصا بالمكان المخصص للنساء..


الصوره الأولى.. فتيات سعوديات بكامل زينتهم (الوجه طبعا فل ميك أب والعبايه كأنها فستان
سهره ومافيه لون بالدنيا إلا فيها وناهيك عن رائحه العطر اللي تشمها من بعد كيلو)
ياترى هل هم جايين للصلاه ولا لشيء ثاني


الصوره الثانية..مايحدث على سُفر الخير بالحرم ( كل وحده تجمع الأكل قدامها هذا غير
الأكياس اللي جنبهم رح تطفح من الأكل ..(مو مشكله خذوا أكل لكن بعد الفطور مو قبل
مايقول الله أكبر يتلم كل اللي على السفره)

ياترى هل هذه أنانيه أو شدة الحاجه


الصوره الثالثة.. مايحدث بعد الأنتهاء من الفطور (الحرم ماله معالم من الأكواب اللي مرميه
بالأرض وفصم التمر اللي بكل مكان وفتافيت العيش والله شيء غريب مع أنه فيه حاويات
للزباله (الله يكرمكم) بكل مكان )


ياترى هل هذا كسل أو عدم مبالاه بما لهذه المكان من قدسيه


الصوره الرابعة..المطبات البشريه (تعالوا شوفوا الحرم بعد صلاة المغرب النوم كبس والناس بدأت تتمدد يعني لااااااازم تهدوا السرعه عشان المطبات ولا رح تدوسواعلى وحده منهم وتروح فيها وتضطروا تدفعوا الديه)

ياترى لهدرجه النوم سلطان أو أنه بالفعل ماعندهم مكان للنوم


الصوره الخامسة..اللي يحصل بصلاة التراويح (كل وحده تقول هذا مكاني حتى لو مكانها برى صف الصلاه وياويلك لو قلتي لها أدخلي بالصف خصوصا الأيرانيه ياكلونك أكل وياويلك وسواد
ليلك لو مريتي من قدام وحده أيرانيه تصلي أذا كانت واقفه ومشيتي من قدامها لازم تلاقي لك خبطه(معليش أتحملي وأمشي) واذا كانت ساجده ومشيتي من قدامها لازم تلاقيلك قرصه برجلك
(كمان معليش الله يسامحها)

ياترى لهدرجه وصلت فينا الحال بالتعامل مع بعض


الصوره السادسة.. صوت صريخ الأطفال اللي أحيانا يطغى على صوت الأمام( طبعا فيه كثير من النساء اللي يجوا الحرم يجيبوا عيالهم عشان يغيروا جو وينفهوا عن أنفسهم طبعا منهم اللي يلعب واللي ياكل واللي يبكي.. صحيح أنه فيه مكان مخصص للنساء اللي معاهم أطفال
لكن الصوت واصل للأماكن الثانيه يعني الله أعلم بالخشوع)

ياترى هل صار الحرم مكان للترفيه وتغيير الجو

الصوره السابعة.. نغمات رنين الجوالات ( تعالوا أسمعوا اللي حاطه ,,بووس الواوا,, واللي حاطه ,,حبيتك تنسيت النوم,, واللي حاطه ,,الأماكن كلها مشتاقه لك,, طيب أذا ربي بلاكم على الأقل حطوه على الصامت وقت الصلاه أو غيروا النغمه أحتراما للصلاه وللمكان اللي أنتم فيه..
.................................................. ...........
ياترى لو دخلنا كنيسه ممكن نشوف فيها هالمناظر

وياترى هل أخلاق المسلمين ذهبت لغير المسلمين
.................................................. ...........

هذه صور ومناظر شفتها من مره وحده رحت فيها للحرم يعني ماخفي كان أعظم
وأعتقد أنه أي أنسان مسلم عنده غيره على دينه وعلى المسلمين رح يحزن من هذه
المناظر ومن تصرفات بعض المسلمين اللي تسيء لنا كمسلمين ...




أتمنى أشوووف ردودكم وتعليقكم على الموضوع

منقول

 

 

[القلب الابيض]

والله معاكي حق الله المستعان

ومشكوره حبيبتي

 

 

[قمرهم كلهم]

والله معك حق


الف شكر

 

 

[ام عزوزي]

والله معاك حق حبيبتي

والله يهديهم يارب

مشكوره على الموضوع الرائع

 

 

[بشرى]

اهلا خواتي

شكرا على المرور

 

 

[تعبت اشكي]

الله يهدي الجميع يارب



مشكورة حبيبتي



يعطيك العافيه

 

 

[بشرى]

اهلا اختي تعوبة

شكرا على المرور